Türkiyənin ən böyük şirin su ehtiyatlarından biri olan İznik gölündə 6 il əvvələ qədər gəmilərin yanaşdığı və sərnişin götürdüyü estakada sudan metrlərlə uzaqda qalıb. 

Mərmərə Bölgəsinin birinci, Türkiyənin isə beşinci ən böyük təbii gölü olan təxminən 300 kvadrat kilometrlik İznik gölünün su səviyyəsi son illərdə azalmaqdadır. Kənd təsərrüfatının suvarılmasında da istifadə olunan göldən suyun çəkilməsi yerlərdə 150 metrə çatıb. Bəzi balıqçı qayıqlarının quraqlıq səbəbindən quruya çıxdığı gölün ətrafında kiçik adalar əmələ gəlib.

2015-2018-ci illər arasında Bursa Böyükşəhər Bələdiyyəsinin Orhangazi və İznik rayon mərkəzləri arasında idarə etdiyi "Akşemseddin" adlı sərnişin gəmisinin yanaşdığı Orhangazi estakadası indi sudan metrlərlə uzaqdadır. Gəminin səyahəti zamanı çəkilmiş fotoşəkillər və estakadanın hazırkı fotoşəkilləri suyun səviyyəsinin dəyişməsini açıq aşkar göstərir. 

Sular çəkildikcə 2014-cü ildə göl sahilindən 20 metr aralıda 1,5-2 metr dərinlikdə tapılan və təxminən 1600 il əvvəl Müqəddəs Neofitos adına tikildiyi təsbit edilən batmış bazilika qalıqlarının əksəriyyəti indi   su səviyyəsinin üzərində qalıb. Aşkar edildiyi zaman varlığı havadan çəkilişlərdən görünən xarabalıqlar son 10 ildə sahildən asanlıqla görünür.