Bu gün biz aktual və ortaq məsuliyyət məsələsini həll etmək üçün bir araya gəlmişik. Xəzər dənizinin davamlı inkişafına və onun ətraf mühitinin mühafizəsinə xüsusi diqqət yetirmək vacibdir. Dünyanın ən böyük qapalı su hövzəsi olan Xəzər dənizi coğrafi məkandan daha geniş məzmun daşıyır. O, həyat xəttidir - biomüxtəlifliyin beşiyi, dolanışıq mənbəyi və ətrafında yaşayan xalqlar üçün birlik simvoludur.

Bu sözləri Qeyri-Hökumət Təşkilatlarına Dövlət Dəstəyi Agentliyinin icraçı direktoru Aygün Əliyeva Xəzər dənizinin ekologiyası mövzusunda keçirilən QHT-lərin beynəlxalq forumunda söyləyib.

“Bununla belə, biz böyük bir fəlakətin uçurumunda dayanırıq. İqlim dəyişikliyi və insanın ehtiyatsız fəaliyyəti öz təsirini göstərir və sübutlar gözümüzün qabağındadır. Azərbaycanda Xəzər dənizinə nəzər saldıqda iqlim dəyişikliyinin təsiri danılmazdır. İldən-ilə dəniz daha da çəkilir, sahilləri daralır, ekosistemləri mübarizə aparır. Bu vəziyyət bizim ixtiyarımızda deyil”, - deyə A. Əliyeva vurğulayıb.

O bildirib ki, Xəzəri qidalandıran çaylar başqa yerlərdən qaynaqlandığı üçün bu, bizim sərhədlərimizdən kənardakı qüvvələr tərəfindən idarə olunur: “Bununla belə, hərəkət etmək bizim borcumuzdur. Təcili və cəsarətli tədbirlər görməsək, prosesin qarşısı alınmaz olacaq. Biz böhran ilə üz-üzəyik. Saysız-hesabsız insanların yaşayışı, mədəniyyəti və gələcəyi təhlükə altındadır”.