“Titanik”  faciəsində 700-dən çox sərnişinin həyatını xilas edən kapitan Artur Rostrona hədiyyə edilən qızıl cib saatı hərracda 1,56 milyon funta satılıb. Bu,“Titanik” xatirə əşyaları üçün indiyə qədər ödənilən ən yüksək rəqəmdir. 

1912-ci ildə Atlantik Okeanında batan "Titanik” 1490-1635 nəfərin ölümünə səbəb olub. Lakin gəmidəkilərdən bəziləri sağ qala bilib. Bu sərnişinlərdən 700-dən çoxunun həyatını xilas edən “RMS Carpathia” gəmisinin kapitanı Artur Rostron olub. 

“Titanik”  faciəsindən sağ çıxanların Rostrona hədiyyə etdiyi qızıl cib saatı İngiltərədə keçirilən hərracda 1,56 milyon funta satılaraq “Titanik” xatirə əşyaları üçün ödənilən ən yüksək məbləğ olub.

Bu satış Titaniklə bağlı xatirə əşyalarının qiymətində yeni bir yüksək səviyyəyə çatıb. Əvvəlki rekord ötən ilin aprelində gəminin ən zəngin sərnişini Con Ceykob Astorun cəsədindən çıxarılan daha bir qızıl cib saatının 1,175 milyon funta satılması ilə yenilənmişdi.

Qeyd edək ki, “Titanik”də  olan skripka 2013-cü ildə 1,1 milyon funta satılıb. Bu qızıl saat isə təkcə suvenir kimi deyil, həm də tarixin dərinliklərindən bir qəhrəmanlıq hekayəsinin simvolu kimi qəbul edilir.