Finlandiya Silahlı Qüvvələri hazırkı “Kalaşnikov” avtomatlarından imtina edərək, Qərb standartlarına daha çox uyğun gələn müasir odlu silahlara keçməyi planlaşdırır.

Finlandiyanın SAKO silah istehsalçısı ordunun silahlanmasına daxil edilməsi planlaşdırılan “Sako ARG” avtomat tüfənginin bir neçə modelini təqdim edib.

Finlandiya əsgərləri indiyədək əsasən sovet “Kalaşnikov” avtomatı (AK-47) əsasında hazırlanmış “RK 62” avtomatından, eləcə də bir qədər modernləşdirilmiş “RK 95” avtomatından istifadə ediblər.

Finlandiyanın “Yle” ictimai kanalı xəbər verir ki, yeni “Sako ARG” hücum tüfəngləri Finlandiya və İsveç orduları ilə birgə hazırlanıb. Onlar Arktika şəraitində istifadə üçün xüsusilə uyğun olacaq.

Bu qərar həm də simvolik əhəmiyyət kəsb edəcək, çünki 7,62 mm kalibrli odlu silahlar əsasən Şərqi Avropada istehsal və istifadə olunur, 5,56 mm kalibrli odlu silahlar isə daha çox NATO ölkələrində istifadə olunur.

Finlandiya 2023-cü ilin aprelində NATO-ya üzv olub.