Nyu-York Şəhər Universitetinin (CUNY) əməkdaşları “Piylənmə baxışları” (“Obesity Reviews”) jurnalının son sayında qeyri-sağlam qida marketinqinin yeniyetmə və gənclərə təsirinə dair geniş icmal dərc ediblər.

Icmal 108 tədqiqat və 19 ədəbiyyat icmalının nəticələrinə əsaslanır. Universitetin siyasət üzrə direktoru Rositsa İliyevanın rəhbərlik etdiyi müəllif heyəti qeyd edir ki, gənclər qeyri-sağlam qidaların reklamlarına geniş şəkildə məruz qalırlar. Bu da qeyri-sağlam məhsulların istehlakının artmasına və qidalanma problemlərinin yaranmasına səbəb olur.

Müəlliflər bildirirlər ki, xüsusilə çoxsaylı KİV-də eyni anda məruz qalma halları az öyrənilib, lakin bu cür məruz qalmanın təsirləri əlavə tədqiqatlar tələb edir.

Universitetin professoru Nikolas Fredenberq vurğulayıb: “Qeyri-sağlam qidalar qarşısı alına bilən xəstəliklərin və vaxtından əvvəl ölümlərin əsas qlobal səbəbidir. Gəncləri hədəf alan bu məhsulların intensiv və çox vaxt aldadıcı marketinqinin daha sərt şəkildə tənzimlənməsinə təcili ehtiyac var”.

Digər həmmüəlliflər arasında hazırda London İqtisadiyyat və Siyasi Elmlər Məktəbi və Kolumbiya Universitetində təhsil alan tələbələr də yer alır.