Çin kosmosa “Zhangheng 1-02” adlı elektromaqnit müşahidə peykini buraxıb. Çin Milli Kosmik İdarəsi ölkənin şimal-qərbindəki Jiuquan Peyk Atma Mərkəzindən Long March-2D raketi ilə kosmosa buraxılan peykin planlaşdırılmış orbitə uğurla yerləşdiyini açıqlayıb. Bildirilib ki, peyk Çinin irimiqyaslı təbii fəlakətlərə qarşı erkən xəbərdarlıq və monitorinq imkanlarını gücləndirəcək.

Peyk təxminən 1800 il əvvəl dünyanın ilk seysmoqrafını yaradan Çinli ixtiraçı Zhang Hengin adını daşıyır. Bildirilib ki, altı il dizayn ömrü olan peyk real vaxt rejimində qlobal elektromaqnit sahələrini, elektromaqnit dalğalarını, ionosferi və neytral atmosferi izləyəcək, geoloji və insan tərəfindən törədilən elektromaqnit anomaliyalarını aşkar edəcək, həmçinin tufan və ildırım fəaliyyətlərini izləyəcək.