Azərbaycan Respublikasının müasir tarixi bir çox çətinliklər və sınaqlarla müşayiət olunmuşdur. Xüsusilə 1990-cı illərin əvvəlləri ölkənin müstəqilliyini yeni bərpa etdiyi, lakin eyni zamanda dərin ictimai-siyasi və iqtisadi böhran yaşadığı dövr kimi yadda qalmışdır. Məhz belə bir zamanda, xalqın iradəsi və təkidli tələbi ilə Ümummilli Lider Heydər Əliyevin yenidən siyasi hakimiyyətə qayıdışı – 15 İyun 1993-cü il, Azərbaycan tarixində dönüş nöqtəsinə çevrildi. Bu gün sonralar "Milli Qurtuluş Günü" kimi tarixi əhəmiyyət qazandı və müasir Azərbaycan dövlətçiliyinin möhkəm təməllərinin qoyulduğu günə çevrildi.

Azərbaycan 1991-ci ilin oktyabrında dövlət müstəqilliyini elan etsə də, bu müstəqillik ilk illərdə ciddi təhlükə altında idi. SSRİ-nin dağılmasından sonra ölkədə formalaşan zəif idarəçilik, təcrübəsiz siyasi liderlik və vətəndaş həmrəyliyinin olmaması ölkəni xaosa sürüklədi. Qarabağ müharibəsi ilə bağlı vəziyyət gündən-günə gərginləşirdi. Ermənilərin işğalçılıq siyasəti nəticəsində Azərbaycan əraziləri ard-arda itirilir, minlərlə soydaşımız qaçqın və məcburi köçkün vəziyyətinə düşürdü.

Daxili siyasi çəkişmələr, çevriliş cəhdləri və Gəncə hadisələri ölkədə tam hakimiyyətsizlik mühiti yaratmışdı. 1993-cü ilin yay aylarında vətəndaş müharibəsi təhlükəsi real həddə çatmışdı. Bu çətin məqamda xalq çıxış yolunu yalnız bir şəxsiyyətin – Heydər Əliyevin ölkə rəhbərliyinə qayıdışında görürdü.

1990-cı ilin iyulunda Moskvadakı yüksək vəzifəsindən istefa verərək Azərbaycana qayıdan Heydər Əliyev əvvəlcə Naxçıvanda siyasi fəaliyyətə başlamışdı. O, burada Azərbaycan dövlətçiliyinin əsaslarını qorumaq üçün mühüm addımlar atmış, Naxçıvan Muxtar Respublikasında sabitlik yaratmışdı. 1993-cü ilin iyununda isə ölkədəki böhranlı vəziyyət fonunda hakimiyyət rəsmləri və xalq nümayəndələri tərəfindən Bakıya dəvət edildi.

15 iyun 1993-cü il tarixində Heydər Əliyev Azərbaycan Respublikası Ali Sovetinin sədri seçildi. Bu hadisə ölkə tarixində yeni mərhələnin başlanğıcı oldu. Onun rəhbərliyi altında qısa müddətdə daxili sabitlik təmin edildi, vətəndaş müharibəsi təhlükəsinin qarşısı alındı və siyasi idarəetmədə çevik və milli maraqlara əsaslanan siyasət tətbiq olundu.

Heydər Əliyevin qayıdışı ilə ölkədə güclü siyasi iradə, milli həmrəylik və sabitlik mühiti yaradıldı. Ölkədə hüquqi dövlət quruculuğu, ordu quruculuğu və iqtisadi islahatlara başlanıldı. Onun təşəbbüsü ilə 1994-cü ildə "Əsrin müqaviləsi" imzalandı və Azərbaycan iqtisadiyyatında neft strategiyası dövrü başlandı. Bu isə ölkəyə beynəlxalq aləmdə olan marağı artırdı və xarici sərmayələrin cəlb olunmasına səbəb oldu.

Bununla yanaşı, Konstitusiyanın qəbul edilməsi (1995), çoxpartiyalı parlamentin formalaşması, insan hüquq və azadlıqlarının təmin olunması, milli-mənəvi dəyərlərin qorunması sahəsində də mühüm addımlar atıldı. Bütün bu uğurların təməlində məhz 15 iyun 1993-cü il dayanır.

1997-ci ildə Azərbaycan Respublikası Milli Məclisinin qərarı ilə 15 iyun – Milli Qurtuluş Günü kimi elan olundu və hər il dövlət səviyyəsində qeyd edilməyə başlandı. Bu gün, sadəcə, bir siyasi dönüş nöqtəsi deyil, həm də Azərbaycan xalqının birliyinin, iradəsinin və xilaskarlıq missiyasının təntənəsi kimi qiymətləndirilir.

Heydər Əliyevin rəhbərliyi ilə əsası qoyulan müstəqil və güclü dövlət quruculuğu siyasəti bu gün də uğurla davam etdirilir. Onun siyasi kursu Prezident İlham Əliyev tərəfindən davam etdirilir və nəticədə Azərbaycan regionda və beynəlxalq arenada güclü, nüfuzlu dövlətə çevrilmişdir.

15 İyun – Milli Qurtuluş Günü, Azərbaycanın tarixində yalnız bir siyasi dönüş nöqtəsi deyil, həm də milli yaddaşın, dövlətçilik iradəsinin və xalq-xilaskar münasibətinin simvoludur. Heydər Əliyevin xalqın çağırışına cavab olaraq hakimiyyətə qayıdışı ilə Azərbaycan yenidən öz taleyinə sahib çıxdı, dövlətçiliyini qorudu və bu günkü uğurlu inkişaf yolunun təməli atıldı.

Azərbaycan xalqı bu günü hər il böyük qürur və minnətdarlıqla qeyd edir, çünki bu gün ölkəmizin sabitliyinin, müstəqilliyinin və tərəqqisinin əsasını qoyan gündür.

Azturkxeber.az saytının təsisçi A.Sahilə Bayramlı