Prezident İlham Əliyevin Sərəncamı ilə təsdiq edilmiş “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”nın Tədbirlər Planına uyğun olaraq, Qaçqınların və Məcburi Köçkünlərin İşləri üzrə Dövlət Komitəsi məlumatlandırma, təbliğat-izahat və təşviqat işləri həyata keçirir.

Bu tədbirlər çərçivəsində Azərbaycan Respublikası Məcburi Köçkünlərin Sosial İnkişaf Fondunun sifarişi ilə "Xankəndi: Xanın kəndi" adlı broşür hazırlanaraq 3 dildə (Azərbaycan, ingilis və rus) çap edilmişdir. Broşürda Prezident İlham Əliyevin 21 dekabr 2023-cü ildə Xankəndi şəhərindəki çıxışından bir parça verilmişdir.

Tanınmış tədqiqatçı-jurnalist Vasif Quliyevin müəllifi olduğu broşürdə Xankəndinin qədim Azərbaycan diyarı olduğu, təməlinin Qarabağ xanı Pənahəli bəy Cavanşir tərəfindən qoyulduğu və Azərbaycan memarları tərəfindən böyük bir şəhərə çevrildiyi qeyd olunur.