Bu əlamətdar gün 2003-cü il avqustun 19-da İraqın paytaxtı Bağdaddakı bir oteldə baş verən partlayışda həyatını itirən 22 humanitar yardım işçisinin, o cümlədən BMT Baş katibinin İraq üzrə xüsusi nümayəndəsi Sergio Vieira de Mellonun xatirəsinə ehtiram əlaməti olaraq təsis edilib. 2008-ci ildə BMT Baş Assambleyası 19 avqust tarixini rəsmi olaraq Ümumdünya Humanitar Yardım Günü kimi qeyd edib.

Hər il avqustun 19-da böhran vəziyyətində olan insanların müdafiəsi, ləyaqəti və rifahı, habelə yardım işçilərinin təhlükəsizliyi, humanitar tərəfdaşları birləşdirmək üçün xüsusi bir mövzu müəyyən olunur. 2025-ci ilin mövzusu “Qlobal həmrəyliyin və yerli icmaların gücləndirilməsi”dir. Bu mövzu təkcə benefisiarlar qismində deyil, həm də öz gələcəyini formalaşdıran fəal iştirakçılar və liderlər kimi icmalarla əl-ələ vermənin mühüm rolunu vurğulayır.

BMT-nin müraciətində deyilir: “Üzvlərimiz bu il ərzində fəal surətdə, fədakarlıqla və qayğı ilə böhranlara cavab verərək ehtiyacı olanlara humanitar yardım çatdırıblar. “Concern Worldwide” təşkilatının dəstəyi ilə 2018-ci ildən bəri Somali üzrə 3,5 milyondan çox köçkün insana çoxməqsədli maliyyə yardımı göndərilib. “Aid Worker Security Database”dən alınan 2025-ci il məlumatlarına görə, Fələstin əraziləri humanitar işçilər üçün ən təhlükəli yerə çevrilib və burada 156 yardım işçisi ölüb. Bu çətin və tez-tez həyati təhlükəsi olan şərtlərə baxmayaraq, üzvlərimiz öz missiyasına sadiq qalırlar.

“Concern Worldwide”, “Welthungerhilfe” və CESVI qurumlarının xətti ilə Ukraynada Birgə Fövqəladə Hallara Müdaxilə (JERU) təşkilatı təsis edilib. Onlar 10 ukraynalı tərəfdaşdan ibarət şəbəkə ilə birlikdə Ukraynanın şərqində, cənubunda və qərbində 10 vilayətdə təsirə məruz qalmış icmalara dəstək veriblər.

2023-cü ilin fevral ayında Türkiyənin cənubunda baş verən dağıdıcı zəlzələlərdən sonra “People in Need” zərərçəkmiş icmalara və köçkünlərə sağalma və həyatlarını bərpa etmək üçün həyati əhəmiyyətli psixososial dəstək və kənd təsərrüfatı yardımı göstərib.

Keçən ilin dekabrında Mozambiki vuran “Çido” qasırğası minlərlə ailəni humanitar böhran vəziyyətində qoyub. Cavab olaraq, “Ayuda en Acción” təşkilatı təbii fəlakətin nəticələrindən təsirlənən həssas icmaları dəstəkləmək üçün bir sıra tədbirlər həyata keçirib.

Şəbəkəmiz bütün dünyada münaqişə, iqlim fəlakətləri və köçkünlükdən təsirlənən icmalara qida, təmiz su, səhiyyəyə çıxışı təmin etməklə həyati əhəmiyyətli dəstək və humanitar yardım göstərməyə davam edir. Biz birlikdə ehtiyacı olanlarla həmrəy olmağa və yerli icmaları yenidən qurmaq və inkişaf etmək üçün gücləndirməyə sadiqik”.