İsveçin Baş naziri Ulf Kristersson alternativ fikirlər əldə etmək və siyasi məsələlərə yanaşmaları müqayisə etmək üçün mütəmadi olaraq süni intellektdən, o cümlədən ChatGPT və fransız LeChat kimi çatbotlardan istifadə etdiyini etiraf edib. O qeyd edib ki, süni intellekt ona ideyalar formalaşdırmağa və alternativ baxış bucağı əldə etməyə kömək edir.

Texnologiyadan bu cür istifadə bəzi ekspertlərdə narahatlıq yaradıb. Umeo Universitetinin professoru Virciniya Diqnum hesab edir ki, süni intellektə hədsiz inam siyasətçilərin hesabatlılığına xələl gətirir. Onun sözlərinə görə, süni intellekt öz rəyini formalaşdırmağa qadir deyil və yalnız onun yaradıcılarının təqdim etdiyi məlumatları təkrarlayır.

Professor əlavə edib: “Sual yaranır: İsveç xalqı tərəfindən seçilən siyasətçilər qərarlar verir, yoxsa Silikon Vadisindən olan texnoloji nəhənglər gələcəyimizi idarə edir? O, sadə suallar üçün süni intellektə nə qədər çox güvənirsə, sistemə həddən artıq inam riski o qədər yüksəkdir. Bu, sürüşkən bir yoldur. Biz tələb etməliyik ki, qərarın həqiqiliyi və etibarlılığına zəmanət verilsin. Axı ChatGPT-yə səs verməmişik”.

Eyni zamanda, Södertörn Universitetinin media texnologiyaları üzrə professoru Frensis Li Baş nazirin təşəbbüsünə daha müsbət yanaşır. O hesab edir ki, süni intellektə müraciət etmək öz inancları üzərində tənqidi düşünmək və alternativ baxış nöqtələrini nəzərdən keçirmək üçün bir yol ola bilər. Professor, həmçinin Amerika platformalarından asılılıqdan qaçmaq, mədəni və siyasi suverenliyi qorumaq üçün İsveç və ya Avropa dil modellərinin yaradılmasının vacibliyini vurğulayır.