Azərbaycan Dövlət İqtisad Universitetinin (UNEC) beynəlxalq əlaqələrinin genişləndirilməsi və mübadilə iştirakçılarının sayının artırılması məqsədilə dekabr ayında UNEC-in 30-a yaxın əməkdaşı Türkiyə, Almaniya, Bolqarıstan, Macarıstan, Rumıniya, Latviya və Litvanın aparıcı universitetlərində olublar.

Bu barədə universitetdən məlumat verilib.

Səfər çərçivəsində nümayəndələr xarici universitetlərin fəaliyyəti ilə tanış olublar, eləcə də UNEC təcrübəsini bölüşüblər. UNEC ilə 20-yə yaxın xarici universitet arasında əməkdaşlıqla bağlı yeni imkanlar yaranıb. UNEC ilə xarici universitetlər arasında mübadilə, ikili diplom proqramlarının həyata keçirilməsi, birgə proqramların yaradılması, layihələrin hazırlanması, müəllim-tələbə mübadiləsi, elmi tədqiqatların aparılması və digər istiqamətlərdə razılıqlar əldə olunub və əməkdaşlıq müqavilələri imzalanıb.