Esenboğa Hava Limanında Dövlət Hava Limanları İdarəsi Ümumi Müdirliyi tərəfindən təyyarə yanğın manevri keçirilib.

Təlimdəki ssenariyə görə, İstanbul-Ankara reysi ilə 1261 nömrəli 160 sərnişin və 7 ekipaj üzvü olan A321 tipli sərnişin təyyarəsi eniş zamanı “qəza”ya uğrayıb.

Təyyarənin mühərriklərində və gövdəsinin altında baş verən yanğınla əlaqədar “təyyarə qəzası və dağıntı” siqnalı verilib, Hava Limanının Xilasetmə və Yanğından Mühafizə  qrupları həyəcan siqnalı ilə hərəkətə keçib.

3 dəqiqə ərzində hadisə yerinə gələn qruplar yanğına müdaxilə edərək qısa müddətdə alovu söndürüb. Ekipaj təyyarənin qapısını içəridən aça bilmədiyi üçün Hava Limanının Xilasetmə və Yanğından Mühafizə  qrupları təyyarəyə xaricdən daxil olublar.

Xilasetmə və təxliyyə əməliyyatının başlanması ilə yaralılar xərəkdə təcili yardım maşınlarına aparılıb və orada ilkin tibbi yardım göstərildikdən sonra xəstəxanalara yerləşdirilib.

Təxliyyə əməliyyatı və yanğının soyudulması prosedurlarından sonra təyyarə təhlükəsiz əraziyə çəkilib və uçuş-enmə zolağı yenidən nəqliyyatın hərəkəti üçün açılıb.